Тинекс Пролет се наоѓа во серија до пет победи во Супер-лигата, а пред нашиот тим викендов е нов предизвик, гостување на екипата на Охрид. Станува збор за пресметка со директен ривал во битката за место во плејофот, кого Тинекс Пролет го победи во првото коло, но избраниците на тренерот Матлиески се свесни дека неделното гостување е сериозен предизвик.

„Во тоа прво коло славевме лесно, но знаеме дека овојпат задачата ќе биде многу потешка. Охрид во меѓувреме влезе во победнички ритам и заслужено се наоѓа во горниот дел од табелата. Сигурно ќе стори се за да ја продолжи победничката серија и против нас, но и ние одиме во натпреварот со сопствени сметки. Забележавме пет победи во последните пет кола и сакаме да продолжиме во ист ритам. Противникот го краси цврста игра во одбраната, но и ние имаме свои адути, треба да играме брзо во напад и цврсто во дефанзива. Ако успееме во тоа, ќе имаме реални шанси за освојување на нови бодови“ - истакнува капитенот Ласко Андоновски.

Охриѓани ќе имаат поддршка и од домашната публика, но бекот на Тинекс Пролет потенцира дека спортската атмосфера ќе ги мотивира и него и неговите соиграчи.

„Јасно е, во таква атмосфера домаќините се во предност, но слободно можам да кажам дека тоа ќе биде мотив и за нас. Секој сака да игра во полна сала, да се докаже пред што побројна публика. Охриѓани создаваат убава атмосфера, затоа очекувам квалитетен натпревар во кој бодовите се важни и за двете екипи“ - вели Андоновски.