Тинекс Пролет ја продолжи серијата победи во плејаут натпреварувањето откако избраниците на тренерот Лембанов триумфираа и на гостувањето против второпласираната Струга, со минимални 31-32. Одбраната не беше на вообичаеното ниво, но затоа беспрекорно функционираше нападот, а улогата на херој му припадна на Аларов, кој го постигна победничкиот гол во последната минута од мечот.

Стружани подобро го отворија мечот и во раната фаза поведоа со три гола предност (5-2, 6-3, 8-5). Тинекс Пролет конечно го пронајде посакуваниот ритам и набрзина стигна до 8-8, по што извесен период се играше „гол за гол“. Домашните ракометари повторно се одлепија и поведоа со 16-13, но со двата гола на пивотот Крстевски гостинскиот состав успеа да намали на 19-17 на крајот од полувремето. По само неколку минути игра во вториот дел следеше израмнување на 20-20, а нешто подоцна и водство на Тинекс Пролет од 21-22. До крајот на мечот се играше максимално израмнето, а искуството на Тинекс Пролет се покажа како клучен фактор во последните минути од овој интересен натпревар.

Струга имаше водство од 31-30, Аларов израмни, а домаќините потоа не реализираа напад за ново водство. Аларов повторно биеше прецизно за водство на Тинекс Пролет од 31-32, по што нашиот тим го одбрани и последниот налет на стружани, за нова победа и зацврстување на првото место во плејаут натпреварувањето.

Аларов, Џонов и Андоновски постигнаа по пет погодоци, додека Крстески и Димов придонесоа со по четири погодоци во овој триумф на Тинекс Пролет.