Ракометарите на Тинекс Пролет денеска (18.30 часот) ќе го пречекаат составот на Струга, во обид со нов триумф уште повеќе да се зацврстат на првото место на табелата во плејаут разигрувањето. Против себе ќе имаат ривал што сезонава веќе двапати го имаат совладано (21-24 во Струга, 30-22 во Скопје), но тренерот Лембанов предупредува на максимална сериозност во пресрет на овој дуел.

„Досегашните две средби беа сосема различни, на првиот во Струга до пред самиот крај се боревме за победата, додека на оној вториот прашањето на победникот го решивме на почетокот од второто полувреме. Струга во однос на тој последен дуел е засилена со нов интернационалец од Црна Гора на голманската позиција, но во тимот нема двајца ракометари кои беа дел од ротацијата во првиот дел од сезоната. Ние знаеме што е потребно, мораме да бидеме цврсти во одбраната и максимално да ги користиме шансите што ќе ни се укажат од контра и полуконтра, преку добра игра во транзиција. Струга е тим што играта ја базира на шутеви од бековските позиции, тоа е она што ќе треба да го неутрализираме“, изјави Лембанов во пресрет на денешната средба.

Тинекс Пролет моментно се наоѓа на првото место со осум бода на плејаут-табелата, еден повеќе од денешниот противник Струга.