Ракометарите на Тинекс Пролет попладнево се враќаат на обврските во плејофот, во Битола гостувајќи му на првиот тим на Еурофарм Пелистер (15 часот, сала „Боро Чурлевски“). Нашиот тим минатиот месец еднаш успеа да ја освои Битола, триумфирајќи над вториот тим на „пелистерци“, но јасно е дека овојпат задачата ќе биде далеку потешка бидејќи избраниците на Матлиески за ривал ќе имаат далеку поквалитетен состав. 

Без оглед на фактот дека домаќините ќе ја имаат фаворитската улога, Тинекс Пролет ќе стори се за да се прикаже во добро светло и доколку се укаже можност, да ги замрси сметките на битолчани на денешниот натпревар.

„Не ни помислуваме да излеземе на терен со бело знаме. Добро познати се инвестициите во играчкиот кадар на Еурофарм Пелистер, но овој тим во последно време е далеку од посакуваната форма. Тие остануваат фаворити, но ние планираме да одиграме максимално од првата до последната минута, па доколку ни се укаже можност и да го изненадиме овој квалитетен состав“, најавуваат од таборот на Тинекс Пролет во пресрет на денешниот дуел.