Ракометарот на Тинекс Пролет, Михаил Аларов, е повикан во македонската репрезентација за собирот на А-селекцијата закажан за почетокот на 2021 година.

Селекторот Данило Брестовац го објави списокот од 20 ракометари кои ќе тренираат во првиот дел од месец јануари, притоа ќе одиграат и два контролни дуели против репрезентацијата на Чиле, во обид да се наметнат и во иднина да продолжат да го носат репрезентативниот дрес.

Аларов, кој има зад себе успешна полусезона во дресот на Тинекс Пролет, сега ќе се обиде да се наметне и во репрезентацијата, каде на пивотменската позиција ќе биде една од трите опции за стручниот штаб, заедно со Жарко Пешевски и Милан Лазаревски.

Тренерот на Тинекс Пролет, Никола Матлиески, е дел од стручниот штаб на репрезентацијата како прв асистент на селекторот Брестовац.