Тинекс Пролет максимално подготвен ќе го дочека последниот натпревар од 2019 година, во кој скопскиот клуб на домашен терен ќе го пречека Пелистер (сабота, 18.30 часот, сала „Македонско Сонце“). Станува збор за ривал со кој избраниците на Матлиески ремизираа во првиот круг од натпреварувањето, прокоцкувајќи убедлива предност во завршните петнаесетина минути од средбата.

Токму таквиот развој на настаните ќе биде дополнителен мотив за домашните ракометари да одиграат максимално во текот на сите 60 минути, за триумфирално да ја заокружат оваа календарска година.

„Последните натпревари во една година секогаш се незгодни, но верувам дека ние ќе одговориме на тој предизвик. Добро се подготвуваме во текот на целата седмица и ќе влеземе максимално во дуелот со Пелистер, свесни дека не смееме да се опуштиме. Битолчани ни се должници од првиот натпревар, на кој водевме до последната минута, но на крајот моравме да се задоволиме само со еден бод.  Пресудна ќе биде нашата игра во одбраната, противникот е добро анализиран. Верувам во нашиот квалитет, да одиграме квалитетно и со триумф да ставиме печат на годината“ - изјави Доне Мајнов во пресрет на утрешниот натпревар.