Ракометарите на Тинекс Пролет успешно ги стартуваа контролните натпревари во пресрет на новата сезона, откако во изминатите 24 часа беа забележани две победи.

Наш ривал синоќе беше тимот на Металург 2, кого во интересен и ефикасен натпревар успеавме да го совладаме со 38-33 (17-15). Денеска Тинекс Пролет беше домаќин на Радовиш, меч на кој за 60 минути беа постигнати вкупно 73 погодоци (39-34). Радовишани одиграа добро во првото полувреме и на одмор заминаа со предност од 16-19, но Тинекс Пролет целосно ја презеде контролата во вторите 30 минути и со голем пресврт стигна до нов триумф.

Тренерот Матлиески на двете средби им даде шанса на сите ракометари да ги покажат квалитетите и начелно може да биде задоволен од прикажаното. Тинекс Пролет во текот на следната седмица ќе одигра контролен натпревар во Лесковац, Србија, против екипата на Дубочица.