Тинекс Пролет одигра извонредно второ полувреме против Вардар јуниор за победнички старт во 2019 година, правејќи уште еден голем чекор напред до плејофот од ракометниот шампионат. 

„Во првото полувреме не бевме во посакуваниот ритам, меѓу другото и поради фактот дека повеќе од два месеци бевме без официјален натпревар. Сепак, ситуацијата се промени во вториот дел, заигравме подобро во одбраната, бевме побрзи во транзицијата и лесно стигнувавме до чисти позиции за постигнување на гол. Квалитетот, како и подолгата ротација беа очигледно и ни ја донесоа победата“ - изјави Иван Џонов, средниот ред во нашиот тим.

Поразот на Охрид во Струга дополнително ја олесни задачата за Тинекс Пролет во битката за плејофот.

„Со најновиот развој на настаните сега ни е доволна и една победа за да бидеме во плејофот. Сепак, тоа не ги менува нашите планови, сакаме да стигнеме до три победи до крајот на сезонава и во триумфален ритам да влеземе во претстојното разигрување со најдобрите тимови во Македонија“ - истакнува Џонов.