Ракометарите на Тинекс Пролет испуштија победа во финишот од дерби пресметката од 11. коло во Супер-лигата, ремизирајќи на крајот со битолски Пелистер, 27-27 (17-14). Во текот на целиот натпревар ракометарите на нашиот тим ја контролираа играта и резултатот, имаа постојана предност против битолчани но во последните минути дозволија гостите да анулираат и четири гола предност на Пролет на крајот заминувајќи со бод од Скопје.

Во првиот дел се играше главно израмнето се до 12-12, кога со одличен финиш Тинекс Пролет стигна до 17-14 на полувремето.

Во второто полувреме слична ситуација на паркетот, со тоа што нашите ракометари постојано одржуваа предност од неколку гола, па стигнувајќи и до 25-21 во финишот. Но, во последните минути гостите успеаја да постигнат шест гола, наспроти само два на Тинекс Пролет за конечни 27-27.

Најефикасен кај Тинекс Пролет беше Мартин Манасков со шест погодоци, а по пет гола постигнаа Ласко Андоновски и Доне Мајнов. Три гола запиша Александар Василевски, а два - Филип Василевски. Во противничкиот тим Марко Кобетиќ постигна шест гола, а Никола Стоилевски мечот го заврши со пет погодоци.

По ова реми Тинекс Пролет остана на третата позиција на табелата со 22 бода, а Пелистер си остана на петтото место со 20 бода.