Репрезентативната пауза заврши, а Тинекс Пролет продолжува  со настапите во плејаут натпреварувањето каде нашиот тим забележа две победи во првите две рунди. Доне Мајнов и неговите избраници ќе сторат се за оваа серија да продолжи и на денешното гостување во Радовиш (17 часот), во дуелот со последната екипа на табелата.

Радовиш не знае за победа од стартот на сезонава, но капитенот Ласко Андоновски како најискусен ги предупредува помладите соиграчи – дека никако не смее да дојде до опуштање во играта.

„Сакаме да победиме и да потврдиме дека сме поквалитетен тим, но тоа можеме да го сториме само со максимално залагање во текот на сите 60 минути. Не смееме да го потцениме Радовиш без оглед на изгледот на табелата. Мораме да ја играме нашата игра, да ги користиме шансите што ќе ни се укажат и да имаме што помалку осцилации. Со тоа би покажале дека сме на вистински пат и би се подготвувале за предизвиците што ќе бидат пред Тинекс Пролет во наредната сезона“, порачува капитенот Андоновски.