Тинекс Пролет не успеа триумфално да ја заврши оваа календарска година откако во последниот меч нашата екипа претрпе пораз во Битола од Еурофарм Пелистер 2 со резултат32-25 . Битолчани влегоа помотивирани во мечот, успеаја рано да се одлепат и потоа да го исконтролираат резултатот до самиот крај.

„Пелистерци“ поведоа со 2-0, првиот гол на Тинекс Пролет беше дело на Палевски од пенал, по што следеа нови три гола на домаќините и нивно водство од 5-1. Скопскиот суперлигаш за момент се разбуди, приближувајќи се до 10-8, по што битолчани влегоа во нова серија и на одмор заминаа со 16-9.

Тренерот на Тинекс Пролет во вториот дел им даде шанса на дел од помладите ракометари во тимот, тие одиграа сосема солидно, но негативата беше преголема, па домашниот тим умешно го приведе мечот до крај и конечните 32-25.

Давор Палевки беше прв стрелец на тимот со седум погодоци, еден помалку постигна Андреј Стојановски, додека со три гола последниот меч за оваа година го заврши Марко Мишевски.