Младинскиот тим на Тинекс Пролет забележа уште една извонредна победа, откако по голема борба славеше на гостувањето против Бутел со резултат 32-33. Охрабрени по големата победа над лидерот Еурофарм Пелистер 2, нашите млади ракометари одиграа уште еден квалитетен меч, покажаа карактер во клучните моменти и се радуваа на победата.

Тинекс Пролет одлично отвори со 0-3, но следеа четири гола во низа на „бутелци“ и нивно прво водство на мечот. Се играше израмнето до крајот на полувремето што домаќинот го доби со 16-15, а со „егал“ игра се продолжи и во текот на вторите 30 минути.

Бутел во неколку наврати водеше со плус два, Тинекс Пролет успеваше да се врати. Клучен беше периодот од 50. до 60 минута на мечот, кога од 30-28 за Бутел младинците на Тинекс Пролет пред се благодарение на одличната одбрана го свртеа резултатот во своја полза, со двата гола на Костов поведоа со 31-33, пред Бутел во самиот финиш да ги постави конечните 32-33.

Трајче Костов одигра одличен меч и со 11 гола беше клучна фигура за победничкиот тим, Симовски го заврши дуелот со шест гола, а Горазд Дамчевски придонесе со четири гола за оваа голема победа.