Последната победа во Радовиш ја врати позитивната атмосфера во редовите на Тинекс Пролет, па скопскиот суперлигаш очекува уште едно добро издание и позитивен резултат и во новата рунда во која на домашен терен ќе го пречека составот на Прилеп (17 часот, сала „Македонско Сонце“).

Станува збор за ривал од кој беше претрпен пораз од 35-32 во првиот круг од натпреварувањето, што ќе биде само мотив плус за сите во таборот на Тинекс Пролет за добро издание и победа над незгодниот ривал.

„Секако дека сакаме да славиме, да освоиме нови бодови и да му се реваншираме на овој ривал за поразот од пред неколку месеци. Кога играме дома секогаш одиме на победа и исклучок нема да биде ниту утрешниот дуел. Тоа не значи дека ќе ни биде лесно, Прилеп се покажа како квалитетен тим, минатото коло убедливо го совлада Бутел што е јасно предупредување за нас, дека мораме да бидеме максимално фокусирани во текот на сите 60 минути. Цврста одбрана и дисциплиниран напад, тоа е она што треба да не краси утре против Прилеп“, изјави капитенот Ласко Андоновски.