Ракометарите на Тинекс Пролет ја забележаа и осмата едноподруго победа во низа против Радовиш во меѓусебните дуели, триумфирајќи со убедливи 23-30 на гостувањето во 14. коло од Суперлигата на Македонија.

Без ниту најмало потценување на противникот избраниците на Никола Матлиески се впуштија во предизвикот против последнопласираната екипа во лигата, па токму затоа уште од самиот почеток се наметна тотална доминација на теренот. Веќе во 13. минута од средбата Тинекс Пролет имаше предност од 1-9, а потоа до 21. минута веќе беше и повеќе од убедливи 3-13.

Тоа значеше и мало опуштање на теренот, повеќе можност и за помладите ракометари, па домашните успеаја да ја ублажат негативата и на полувремето нашите ракометари заминаа со предност од 10-15.

Во второто полувреме слична доминација на ракометарите на Тинекс Пролет кои лесно до 45. минута дојдоа повторно до 16-24. Во игра гол за гол во продолжението до крајот на средбата, само рутински се одржуваше предноста и за конечна победа од 23-30.

Најефикасен во нашиот тим беше Давор Палевски со седум гола, шест погодоци запиша Ласко Андоновски а со пет гола мечот го заврши Марко Мишевски. Три гола постигна Никола Стоилевски, а по два погодоци имаа Трајковски, Глигоров и Стојановски. Кај домашните, во составот на Радовиш, со пет гола мечот го заврши Постолов, а Димов постигна четири погодоци.