Ракометарите на Тинекс Пролет претрпеа пораз од 27-36 во рамките од десеттото коло од Супер-лигата, очекуван исход ако се знае дека „вардарци“ се единствениот тим со максимален ефект во досегашниот дел од Супер-лигата. Избраниците на тренерот Матлиески заслужуваат пофалби за начинот на кој го одиграа речиси цело прво полувреме во кое целосно му парираа на фаворитот, но сепак немаа сили да го издржат темпото до самиот крај и претрпеа пораз.

Палевски и Мишевски ги постигнаа првите два гола за Тинекс Пролет за рани водство од 1-0 и 2-1, а дури и кога Вардар поведе со 2-4 домашниот тим експресно имаше одговор. Следеше брзо израмнување на 5-5, а потоа со новиот гол на Палевски и водство од 6-5 (10. Минута од мечот). Во периодот до 25. Минута можеше да се проследи целосно израмнет ракомет на двете страни, резултатскиот егал траеше до 23. Минута кога на семафорот гласеше 13-13, но „вардарци“ подобро го затворија полувремето и на одмор заминаа со резултат 16-20.

Гостите потоа го отворија второто полувреме со три брзи гола пред Мишевски да ја запре оваа нивна мини-серија, но победникот веќе беше практично решен. Тинекс Пролет солидно парираше до крајот, но „вардарци“ знаеја како да го исконтролираат резултатот до самиот крај и да слават со конечни 27-36.

Стоилевски и Палевски беа најефикасни во таборот на Тинекс Пролет со по пет погодоци, четири гола постигна Стојановски, а три Дрпљанин.