Младинскиот тим на Тинекс Пролет забележа уште еден одличен резултат откако во рамките од третото коло на гостински терен славеше против Еурофарм Пелистер со 27-31. Нашите млади ракометари одиграа супериорно второ полувреме во кое беа подобри од противникот, го свртеа резултатот во своја полза и на крајот се радуваа на победата.

Првото полувреме почна со израмнета игра, но битолчани први дојдоа до „плус два“ (6-4, 7-5, 8-6). Тинекс Пролет израмни на 8-8, но „пелистерци“ влегоа во нова серија поведувајќи со 13-9. На полувреме се замина со 14-11 по голот на Дамчевски, а вториот дел го започнавме со погодок на Костов за 14-12.

Клучен беше периодот од 38. до 51. Минута, во кој од 18-16 му дозволивме на противникот да постигне само еден единствен гол. Одличната одбрана беше надополнета со ефикасен напад, па со голот на Јовиќ тимот на Тинекс Пролет поведе со 19-23. Нашите младинци веќе земаа залет и беа незапирливи до крајот, поведоа со 21-27 и потоа рутински го приведоа мечот до конечните 27-31, не дозволувајќи разликата во ниту еден момент да се спушти под три гола.

Горазд Дамчевски со осум гола беше прв стрелец во оваа голема победа, додека по шест погодоци реализираа Јовиќ и Симовски.