Младинската екипа на Тинекс Пролет забележа значајна победа на градското дерби против Бутел, заслужено триумфирајќи над овој ривал со конечни 31-27.

Триумфот е апсолутно заслужен ако се знае дека нашите млади ракометари одлично отворија и поведоа со 5-0, имаа контрола над резултатот во голем дел од првото полувреме, но гостите сепак влегоа во ритам пред крајот на полувремето и на одмор се замина со израмнети 14-14.

„Егал“ се играше десетина минути во второто полувреме, но пресуден се покажа подобриот финиш на младите ракометари на Тинекс Пролет. Имено, по минималната негатива од 19-20 следеше серија од четири гола на домашниот состав поведувајќи со 23-20. За разлика од првиот дел, овојпат Тинекс Пролет одигра максимално фокусирано, ја задржа предноста до самиот крај и заслужено се радуваше на победата.

Горазд Дамчевски одигра уште еден маестрален меч и со девет гола го предводеше својот тим до триумф. Значаен придонес со по пет погодоци имаа и Јовиќ и Лешниковски, додека три гола постигна Костов.

Одлично издание на овој натпревар имаше и голманот Лазе Великиќески кој неодамна пристигна од Струга и со 15 одбрани беше меѓу најзаслужните за оваа голема победа.