Ракометарите на Тинекс Пролет влегуваат во пеколен ритам на натпревари, па денеска ги очекува нов огромен предизвик - дуел на домашен терен против екипата на Еурофарм Пелистер (18.30 часот, сала „Македонско Сонце“).

Шампионот влегува со голема самодоверба во овој натпревар откако викендов славеше на дербито против Вардар и нема дилема дека битолчани ќе сторат се за да слават во Скопје за да останат во игра за првото место во Супер-лигата. Од друга страна, Тинекс Пролет без резултатски притисок ќе влезе во натпреварот, со јасна желба да го даде максимумот и да се обиде да го изненади шампионот.

„Дуелите со најдобрите екипи во македонскиот ракомет секогаш се мотив да се даде најдоброто од себе,така ќе биде и на денешниот натпревар. Се среќаваме со актуелниот шампион, тим што игра одлично под водство на новиот тренер и секако овој дуел ќе биде голем предизвик за нас. Нема резултатски притисок, но постои голема желба да одиграме квалитетен натпревар и да го потврдиме квалитетот што го поседуваме. Мораме да бидеме дисциплинирани во нападот и цврсти во одбраната ако сакаме достојно да се спротивставиме, едно е сигурно, нема да се предадеме без борба на овој натпревар“, порачуваат од таборот на Тинекс Пролет во пресрет на денешниот меч со битолчани.