Реванш, за поразот во првата сезонска меѓусебна пресметка, на најдобар можен начин против екипата на Струга во 14. коло од Суперлигата на Македонија, сега со убедлив триумф на Тинекс Пролет од 38-26 (18-14). Исклучително два важни бода со кои нашата екипа останува во игра за плеј-офот во домашното првенство.

Уште на стартот од натпреварот преку разиграните Стојановски и Бакар се создаде предност која во 25. минута изнесуваше и шест гола разлика (16-10), со што веќе беше најавена победата на натпреварот. До крајот на полувремето, гостите успеаја единствено малку да ја ублажат негативата, за 18-14 на паузата.

Избраниците на Александар Јовиќ и низ првите минути од второто полувреме во континуитет ја одржуваа предноста со максимална контрола на играта и резултатот. Комплетниот отпор на Струга се скрши целосно низ последните 15 минути кога се дојде до убедливата победа од 12 гола разлика (38-26).



Најдобри поединци кај нашата екипа беа Андреј Стојановски и Мохамед Бакар со по шест постигнати гола, а со по пет постигнати погодоци натпреварот го завршија Ласко Андоновски и Томислав Димковски. Кај Струга се издвои Ненад Костоски со осум гола,а Богдан Мијушковиќ натпреварот го заврши со пет погодоци.