Тинекс Пролет не успеа да се пласира во финалето од групната фаза од Купот на Македонија откако нашиот тим загуби со убедливи 22-32 во полуфиналната пресметка со Голден Арт. Овој пораз претставува сериозна шлаканица ако се земе во предвид фактот дека ја имавме фаворитската улога пред мечот, но ракометарите целосно потфрлија на теренот и убедливиот пораз беше неизбежен.

Тинекс Пролет го контролираше резултатот од самиот почеток, поведувајќи со 3-1. Гостите за момент стигнаа до 3-3, но следеа три гола во низа на домашните ракометари за водство на Тинекс Пролет од 6-3. Голден Арт не се откажа, успевајќи да намали на 6-5. Во периодот кога се разбрани голманот Михаљевиќ беа правени брзоплети грешки во нападот, што придонесоа гостите да останат во мечот. Тинекс Пролет имаше и 10-7, во финишот од полувремето во ритам влезе и капитенот Андоновски (три гола во последните пет минути), но Голден Арт подобро го заврши овој дел од мечот, со гол во последната секунда на Даев израмнувајќи на 12-12. 

Гостите потоа подобро го отворија и вториот дел, поведувајќи со 13-15, а неколкуте одлични одбрани на нашиот голман Петковски помогнаа кризата да не донесе и уште поголема негатива. Палевски при овој резултат не искористи седмерец, а Голден Арт го казни тоа со гол за најубедливо водство на спротивната страна (13-16). Следеше нов седмерец и ново промашување, овојпат Мајнов шутираше над гредата, по што Голден Арт погоди со двајца играчи помалку за водство од 13-17. При 14-18 не беше реализиран и трет пенал во низа, а кога негативата стигна до пет гола (14-19), тренерот Јовиќ беше принуден да побара тајмаут. Ситуацијата на теренот не се промени, Голден Арт уште повеќе ја зголеми својата предност и го контролираше мечот до самиот крај, заслужено триумфирајќи со убедливи десет гола разлика (22-32).

Ласко Андоновски беше најефикасен во нашиот табор со пет гола, четири постигна Палевски, а по три Димковски, Арсеновски и Стојановски.

Ова е сериозна опомена за нашиот тим, кој одигра далеку под своите можности во најслабиот меч оваа сезона, нешто што никако не смее да се повтори до крајот на плејофот.