Тинекс Пролет ги почна подготовките за вториот дел од сезонава со минимален пораз на денешното гостување против Вардар (28-26). Ова беше прв контролен меч за двата тима зимава, при што тренерите Недановски и Јовиќ им дадоа шанса на сите ракометари да покажат дел од своите квалитети.

Првото полувреме мина во подобра игра на „црвено-црните“, кои одиграа ефикасно во нападот, на одмор заминувајќи со водство од 17-11. Како што одминуваше времето, така и играта на Пролет стануваше се подобра, па избраниците на Јовиќ до самиот крај успеаја да ја намалат негативата на само два гола.

Контролниот дуел со Вардар во секој случај беше добра можност за тренерот Јовиќ на дело да ги види своите избраници, од кои ќе очекува кревање на формата како што ќе минуваат овие подготовки.

Тинекс Пролет во наредниот пријателски натпревар ќе се сретне со скопскиот ривал Голден Арт.