Тинекс Пролет не успеа посериозно да му се спротивстави на шампионот Еурофарм Пелистер, губејќи на денешното гостување во Битола со 32-21 во рамките од претпоследното коло од Супер-лигата. Солидниот отпор траеше само дваесетина минути, по што „пелистерци“ ја демонстрираа разликата во квалитет на терен и заслужено стигнаа до убедлива победа.

;Мартин Димов донесе почетно водство во првата минута, а потоа благодарение на Андоновски и на Арсеновски игравме „егал“ до 5-5. Еурофарм Пелистер во тој момент заигра далеку подобро во одбраната, по што домашниот состав влезе во серија и набрзина поведе со 10-5. Тинекс Пролет за момент се консолидираше и намали на 12-9, но завршницата од првиот дел мина во знакот на битолските ракометари, кои на одмор заминаа со водство од 18-12. 

Тинекс Пролет катастрофално го почна второто полувреме што домаќините го отворија со серија од 6-0, експресно поведувајќи со 24-12. Отпорот беше целосно скршен, па до крајот на мечот се играше егал, без преголем притисок во одбраните на двете страни, за овој меч да заврши со конечни 32-21. 

Арсеновски беше најефикасен во нашиот табор со пет гола, четири постигна Андоновски, а три Димковски. 

Тинекс Пролет е четвртопласиран на едно коло до крајот на Супер-лигата, со два бода предност во однос на Голден Арт на петтата позиција. За пласман во плејофот доволен ни е бод во последното коло на домашен терен од Бутел, или Голден Арт да не триумфира во својот последен меч против екипата на Вардар.