Тинекс Пролет во второто суперлигашко коло ја забележа и втората победа, триумфирајќи на домашен терен над Прилеп со 30-25. Гостите се покажаа како незгоден ривал што неслучајно во првото коло го изненади Бутел, но Тинекс Пролет имаше и искуство и квалитет за да не дозволи изненадување во „Македонско Сонце“, на крајот славејќи заслужено со конечни пет гола разлика.

Прилепчани имаа минимално водство од 1-2 и 2-3, на што Тинекс Пролет одговори со три гола во низа и водство од 5-3. По голот и изнуденото исклучување од капитенот Андоновски, тимот на Тинекс Пролет поведе со 9-6, а тренерот на Прилеп побара тајмаут. Гостите се приближија до 10-8 и 11-9, но потоа следеа нови три гола во серија на Пролет и ново резултатско одлепување, по што на одмор се замина со предност од 17-13.

Неочекувано, второто полувреме почна со доминација на прилепчани, нашите ракометари нецели десет минути немаа постигнато гол, а гостите го искористија тоа за да стигнатдо израмнување од 17-17. Доне Мајнов го прекина налетот на противникот, потоа важни погодоци постигнаа и Димковски и Андоновски, по што се играше израмнето се до помалку од десет минути до крајот. Прилеп парираше до 24-23, но завршницата мина во знаткот на Тинекс Пролет, цврстата одбрана даде резултат, беа постигнати и лесни голови на спротивната страна, за конечен триумф од 30-25. 

Давор Палевски ги предводеше стрелците со пет гола, по четири постигнаа Арсеновски, Димковски, Пецаковски и Андоновски.

Тинекс Пролет во рамките од третото коло ќе му гостува на тимот на Вардар.