Ракометарите на Тинекс Пролет денеска (18.30 часот, сала „Македонско Сонце“) ќе го играат првиот домашен натпревар во рамките од плејофот, против екипата на Тиквеш. Кавадарчани се добро познат ривал за Лембанов и неговите избраници, ако се знае дека Тинекс Пролет одигра две средби со Тиквеш во првиот дел од сезоната, ремизирајќи во Кавадарци пред да слави лесно и убедливо со 24-19.

Во меѓувреме, од Тинекс Пролет си заминаа неколку квалитетни ракометари, но тимот продолжува да работи напорно и да игра квалитетен ракомет, што беше докажано и на дуелот со шампионот Вардар на кој нашата екипа во долги периоди им парираше на „црвено-црните“. Тоа дава право за оптимизам дека со добро издание на денешниот дуел може да се стигне и до триумф над Тиквеш.

„Можеби многумина сметаа дека ќе дојде до голем пад кај Тинекс Пролет по сите оние заминувања. Сите знаат колку значеа Џонов, Аларов и Јагуриновски за нашата игра, но искрено многу ме радува што продолжуваме да играме добар ракомет и откако тие не се дел од нашиот тим. Го покажавме тоа на подготвителните натпревари, како и на последниот дуел со Вардар и сега сакаме таа серија на добри игри да ја продолжиме и против Тиквеш. Знаеме се што треба да се знае за противникот, му ги познаваме добрите и лошите страни, но најважно ќе биде ние да одиграме онака како што треба. Со вистински пристап и со квалитетен ракомет, можеме да стигнеме до првата побед во плејофот“, изјави капитенот Ласко Андоновски.