Солиден отпор и пораз од шампионот Вардар (30-23)

Тинекс Пролет претрпе пораз од 30-23 на гостувањето против Вардар во рамките од првото коло на ракометниот плејоф на Македонија. Актуелниот шампион ја оправда фаворитската улога, а нашиот тим и со подмладен состав во голем дел од натпреварот целосно му парираше на првакот, покажувајќи потенцијал и давајќи простор за оптимизам пред продолжението од сезоната.

„Вардарци“ беа нешто подобар противник во почетните минути од мечот, поведувајќи со 5-2. Тинекс Пролет сепак покажа карактер и успеа да се врати, најпрвин израмнувајќи на 7-7, а нешто подоцна во неколку ситуации и поведувајќи со по еден гол разлика (9-10, 10-11, 11-12). „Црвено-црните“ успеаја да направат пресврт во финишот од полувремето, со серија од 3-0 најпрвин поведоа со 14-12, заминувајќи на одмор со водство од 17-14. 

Цврстата одбрана на стартот од второто полувреме придонесе негативата да биде спуштена на само еден гол (18-17). Сепак, како што одминуваше времето така и подмладениот состав на Тинекс Пролет губеше сила, а искусниот тим на Вардар знаеше како да го искористи тоа. Полското крило Чувара имаше свој ден за „црвено-црните“ и со 13 постигнати погодоци го предводеше својот тим до победа од конечни 30-23.

Александар Василевски со пет гола беше најефикасен во таборот на Тинекс Пролет, по четири постигнаа Крстевски и Андоновски, а три пати прецизен беше младиот Виктор Додевски.

Тинекс Пролет во следното коло на домашен терен ќе го пречека тимот на Тиквеш.