Ракометарите на Тинекс Пролет денеска во 16 часот гостуваат на Струга во обид да стигнат до втората победа во плејоф доигрувањето. Стружани се со серија порази од стартот на плејофот, но тоа не го менува фактот дека станува збор за квалитетен спој на младост и искуство. 

Поради ова, избраниците на Александар Јовиќ се свесни дека мора да се одигра максимално од првата до последната минута ако се сака да се стигне до победата.

„Изгледот на табелата воопшто не е важен во овој случај, Струга има квалитетен состав што може да казни секого што барем за момент ќе го потцени овој тим. Ние сме свесни за сопствените квалитети, но и максимално го  почитуваме денешниот ривал. Знаеме дека ако одиграме стопроцентно можеме да стигнеме до бодовите и затоа ќе сториме се за да ја забележиме првата гостинска победа во плејофот. Клучна ќе биде нашата дисциплина во нападот, ако одиграме квалитетно и го лимитираме бројот на лесни голови на противникот верувам дека можеме да триумфираме“, изјави Ласко Андоновски, капитенот на тимот на Тинекс Пролет.

Мечот во салата „Нико Нестор“ во Струга почнува во 16 часот, а задолжени за делење на правдата се Виктор Начевски и Даниело Божиновски.